انت فين في الدنيا

" بعد أذنك ، مالكش مكان في العالم، اللى بعدة" الجملة دى سمعناها امتى وفين ؟ هوة في حد عاقل يقول الكلام دة. ولا انت بتهزر معايا؟ ولا شكلك بتهزر؟معلش استحملني بس الجملة دى حتتقال لنا كلنا قريب، وربنا يستر علينا وعليك.اية يا عم انت حتخوفنى ولا اية؟ دة انا جامد برضة مايغركش.معلش بس فهمني الحوار ورسينى كدة وقول لى .. هوة اية النظام؟ بص يا سيدى وأنا حافهمك واحدة واحدة بس ركز معايا ربنا يكرم وفتح لى دماغك.الموضوع وما فيه أن كمان كام سنة العالم كلة حيبقى قارة واحدة وبلد واحد وتحت حكومة واحدة. مش بسرح بيك بس تخيل معايا كدة أن دة يحصل قريب كمان سنتين ولا حاجة.وان اللى حيحكم العالم دة الأمم المتحدة ، والناس دول بقى قرروا أن يستغنوا عن الناس اللى مالهاش لازمة في الحياة، واللى له لازمة حيخلوة قاعد على كوكب الأرض.حتقول لى بناء على اية هما حيعملوا كدة، كلام فى سرك ...واضح كدة بقى انهم حيعملوا مقابلة مع كل واحد من البشر وحيسألونا سؤال واحد بس..... بناء على السؤال دة حيحددوا إذا كان ليك لازمة ولا مالكش لازمة في الدنيا.كدة بقى حتخوفنى ... اية السؤال دة يا عم ، أكيد حنعرف نجاوب علية، هيه شغلانة؟ اى سؤال هما عايزين يسألوه حنجاوب علية واحنا مابنخافش. قول يا عم السؤال اللى هما حيسألوة دة وأنا أجاوبك على طول." اية الحاجة اللى تقول لنا انك تكون معانا فى الدنيا دى؟"... نعم اية ؟ بتقول اية؟ فين السؤال؟ مش فاهم ؟هوة دة السؤال اللى حيتسأل لنا كلنا يا عم .... انا قلت لك في الأول ركز معايا... طب معلش تانى السؤال..... حاضر يا سيدى، ببساطة شديدة حيسألونا سؤال : اية اللى بيميزك عن الآخرين؟ اية اللى يخليك مختلف عن الآخرين؟ اية الحاجة اللى تخلينا نقول ان انت لازم تبقى موجود فى الدنيا؟اه انا فهمت انت جاى بتتريق عليا كدة.... مش كدة ولا اية؟ اية ياعم السؤال اللى انت بتسألة دة؟ يا سيدى احنا اتفقنا إننا حنتخيل... تخيل معايا بس وشوف حترد على السؤال ازاى؟ مش قلت لى ان احنا حنعرف نجاوب على اى سؤال؟ أبوة صحيح.... انا قلت كدة بس تصدق انا مش عارف أجاوب على السؤال.. هوة صحيح فعلا أنا اية اللى يخليني مميز عن غيري؟ جايز عشان معايا عدة نوكيا جامدة أخر حاجة. ولا يمكن عشان جبت كمبيوتر امكانياتة اعلى إمكانيات موجودة فى السوق وماحدش جابها بعديا؟بص يا سيدى عشان بس تبقى عارف انا احنا مش عارفين نجاوب، بس جايز لو دورنا كويس فى نفسنا حنلاقى حاجة أكيد، ولو مالقيناش حاجة نعمل اى حاجة تقول ان احنا مميزين عن غيرنا عشان حتى يا آخي مانضربش لخمة قدام الناس اللى حيسألونا .معاك حق، بس هوة انا عايز اسأل سؤال؟ هوة أحنا مين ؟انت مين؟ انت بجد بتسأل السؤال دة؟ انا بصراحة مندهش من سؤالك بس عشان انت سألت سؤال كويس وتعبت معايا وتخيلت معايا القصة دى انا حجاوبك. أنت إنسان من ضمن مليارات من البشرعايشين على وجه الأرض ، انت مجرد إنسان عايش فى حي من أحياء بلد، والبلد اللى انت فيها جزء من محافظة، والمحافظة اللى انت فيها دى جزء من دولة، والدولة الكبيرة دى جزء بقى صغير من قارة. والقارة اللى انت بتنتمنى إليها دى جزء من الكرة الأرضية.عارف بقى الكرة الأرضية اللى انت ساكن فيها دى، تعتبر كوكب من ضمن كواكب كثيرة موجودة فى النظام الشمسي، خد بقى دى عارف بقى ان النظام الشمسي دة عبارة عن جزء من مجرة كبيرة، المجرة دى بقى فيها نجوم كتير وكواكب كتير وحاجات كتير كدة؟، اصبر بقى خد دى، المجرة دى بقى تعتبر ...... كفاية ياعم انت حتودينى تانى فين أكثر من كدة؟ دة انا على كدة أحنا مانسواش حاجة من كل اللى انت بتقول دة.دة أحنا يا آخى صغيرين قوى، اية دة كلة، ناقص تقول لى ان الكلام دة كلة اللى انت بتقولة شغال بقالة خمسين قرن ؟ لا ياعم دة شغال أكثر من كدة، وناس راحت وناس جت وناس لسة جاية ، كل دة وأنت بتسألنى إحنا مين ؟يعنى انت عايز تفهمني ان كل اللى انت قلته دة شغال لينا أحنا ؟ المجرات والنجوم والكواكب والشمس والأرض وكل دة شغال لينا أحنا. عشان تعرف احنا عند ربنا أد اية لازم نعرف هوة عمل لنا اية وسخر لنا كل دة لية؟أكيد عشان نعبدة بس مش نعبدة وبس، دة ربنا قال ان الإنسان دة خليقة الله فى الأرض، واننا لازم نعمر الأرض.تخيل بقى بعد كل دة والواحد فينا عايش لنفسة بس ، شايفين ان احنا مركز الكون، وعايزين كل حاجة بنطلبها لنفسنا وخلاص، عايشين عشان نفسنا بس... طب هل دة اللى حيخلينا مميزين ونستحق إننا نكون فى العالم؟ احنا بنعيش اليوم يومه مابنفكرش غير فى نفسنا بس ، ناكل ونشرب ونتجوز ، طب وبعدين؟ اية اللى بعد كدة؟ أكيد فى حاجة تانية المفروض احنا عايشين لها.مش بس عبارة الله لكن أكيد فى حاجة هيه دى اللى حتخلينا نتميز عن غيرنا.في ناس علماء عملوا حاجات كتير للبشر ، خدموا الإنسانية، زى زويل وزي علماء كتير زية قدموا خدمات كثيرة للبشر، أكيد دول هما الناس المتميزين. أكيد كانت عندهم رسالة او هدف عايزين يحققوة لغيرهم مش لنفسهم، هوة دة أكيد اللى ببخلي الواحد يتميز عن غيرة. اه انت بقى كدة حتقول لى ابقى زى العلماء دول، مش كدة برضة؟ بص ياعم انا فهمتك بس انا مش حاتغير، وأنا زى مانا ، وأنا ماقدرش اعمل اللى انت بتقول لى علية دة؟ وعشان تعرف معلومة ، انا مش سوبرمان.ياعم والله ولا انا كمان سوبرمان، ياسيدى انا زيي زيك بالظبط، بس مش معقولة الواحد يتخيل كدة ان ربنا عمل لنا كل الحاجات دى على الفاضى كدة، مش معقولة يعنى؟ ولا أية؟ ربنا خلانا في احسن صورة.انت عارف أن ربنا حط فينا أجهزة بتشتغل ليل نهار بتخدمنا، تفتكر كل دة لية؟ انت مش عارف بس قيمة نفسك، احنا أفضل مخلوقات عند ربنا ، انت عارف كدة؟ مش لازم نبقى زى زويل ولا أي عالم من العلماء رغم ان العلم مطلوب، بس مش شرط نكون زيهم، بس ممكن حاجات بسيطة تخلينا مميزين عن غيرنا ومميزين أيضا عند ربنا.نرسم بسمة على وش حد، نساعد فقير، نساهم فى مشروعات تطوعية، نعمل حاجة مفيدة لينا ولغيرنا دة اللى حيخلينا مميزين عن غيرنا. أكيد بعد كل اللى أحنا قولناه دة حنبدأ نغير من نفسنا ونبتدى حياه كلها عطاء وخير ومساعدة للناس.نرجع ونسأل نفسنا اية الحاجة اللى فينا تخلينا مميزين عن غيرنا؟ ولا ممكن يقولوا لينا بعد المقابلة " بعد أذنك ، مالكش مكان في العالم اللى بعدة" .

تسلمى كنزى